اخبار

كان يوم كتير حلو وكتير منيح أنجزت كتير،

كان يوم كتير حلو وكتير منيح أنجزت كتير، كان عندي ٦ اتصالات واجتماعات الحمد لله قطعوا وكانوا حلوين.

يالله شو مبسوطة اليوم، حلاوتا هلأ روح عال waterfront العب بالبيسيكليت.

كان عندي call لازم يخلص عال6:00 وامشي دغري، بس يا الله، مددوا عشر دقايق، حإنزل عالتواليت تما ضيع وقت. ما عندي call عال7 كمان!

بوصل لنص الدرج بحس في بلبلة شوي، بوصل لآخره بيطلع صوت مع هزة قوية، بيهز المبنى كلو، الكل بيصرخ… انفجار.. انفجار.. وما بحس إلا القزاز والحديد بلشوا يطيروا صوبنا. باتجاهنا.

أول ردة فعل الي، فتت عالتواليت لاقدر اهرب بعدين 🙂 اتصلت بالبابا قبل ما يعرف في انفجار لقلو انا منيحة. ما بعرف من وين اجتني القوة والأعصاب. وانا وشايفة هالدمار رجعت عالمكتب، ضبيت كل اغراضي، حملتن ونزلت.

بعد شي ساعة، لما تأمنت الطرقات شوي ونوعا ما ارتحت انو محا يطلع انفجار تاني، مشيت لمطرح آمن. لما امشي عالرصيف ينزل عليي قزاز من المباني… ارجع امشي عالسكة. شفت حدا من الشركات كلو دم، ما كان معي شرجير كافي، الشبكة تروح وتجي واهلي قلبن ع نار.

بعدين، لما طلعت بالتاكسي، بطلت حاسة بإجريي ولا بضهري بطلت مركزة احكي او فكّر…..

لما التاكسي طلع ع مطب، صرخت. صوت الانفجار بشع كتير. الAC هلأ عم يطلع صوت متل رجة، فزعانة… هيدي الرجّة قبل ثواني ما يصير القزاز بالأرض…. قلبي عم يوجعني كتير.

الله يرحم اللي راحوا، يشفي الجرحى، ويخلي الجميع لاهلن وأحباؤن❤️❤️

الصورة من bdd 😭😭😭😭😭