اخبار الصباح و اخر التطورات ( بالعامية )

اخبار عالريق

■ الجو حيكون اخر حلاوه صيف وكيف ليوم الخميس وبعد الخميس برجع الشتا من جديد.

■ ارتفاع عدد مصابين كورونا باسرائيل الى ٥٠ مصاب

■ اسرائيل تفرض الحجر الصحي على كل مستوطن يعود الى البلاد بعد عودته من السفر.

■ الاجهزه الامنيه تغلق المقاهي والكوفي شوبات بالخليل وطولكرم.

■ محافظ نابلس يمنع زيارة المرضى بالمستشفيات بحيث يمون مرافق واحد لكل مريض.

■ شرطة طولكرم تحتجز باص محملا بالركاب كان متجها لصالة افراح وتمنعه من الذهاب للقاعه.

■ بالنسبه لدوام المعلمين:لا يوجد دوام اليوم لا للمعلمين ولا للمدراء في المدارس.
■ اشتيه بطمن الرئيس وبقوله الامور كلشي تمام التمام،بس كزب عليه نتوفه صغيره وهو كاله فش استغلال واحتكار من التجار،(كزبه بيضا)بطلعله.

■ بما انه اليوم الثلاثاء وعنا بسموه جحش الاسبوع انا شخصيا بناشدكم تنتبهوا على ولادكم واعطوهم دروس توعيه للي بصير .

■ اقتحام عدة قرى ومدن فلسطينيه وفي هذه الاثناء وانا بكتب البوست تم اقتحام مدينة طوباس من عدة جهات وهناك اعتقالات في انحاء الضفه

■المستوطنين اقتحموا جبل بمنطقة حي الطيره برام الله،وصارت مواجهات عنيفه بالمنطقه.

■ بالنسبه لمعبر الكرامه تم اغلاقه امام المغادرين من الضفه للاردن وبعد شوي ردوا فتحوه..ربنا يحمي الجميع.

■ محافظ رام الله ليلى غنام بتأمر باغلاق كافة المطاعم والمقاهي وكافة اماكن التجمعات تحت كل المسميات.

■سعر الجاج ١٣ شيكل الكيلو وجرة الغاز حسب اي طابق ساكن واذا المصعد خربان او بيتك عليه درج بصير حقها فوق ال٧٣ زي حالتي مثلا..

■يعني جماعة الحمام الدمشقي واللي عملوه بنابلس وبدي اذكر اسمهم لانهم بستحقوا…ولاد عائلة هيرون المناضله،عاهد وعمار وابو سليم ،روحوا الله يوفقكم ويجبر خاطركم ويفتح الرزقه بوجكم ،وربنا يحمينا ويحميكم ويحمي نابلس وكل فلسطين من هالمرض.

■ الوضع سئ والناس عم تشكي من قلة الاشغال،وانا بحكيلهم يا حبايبي لو لا سمح الله اتصاوب حد من قرايبك مآنتا بتتمنى لو عطلت شهرين وتلاته، فتره عصيبه وصعبه وبتمر،قولوا يارب بس.

وهاي مناشده بتمنى من جميع الاخوان ان يلتزموا بالتعليمات التي تصدر من جهات الاختصاص فقط وان لا تلتفتوا ورا الشائعات وربنا يحميكم.

#صباح_الخير للقياده الحكيمه الرشيده اللي بتشبك ليلها بنهارها عشان تبقى عتواصل مع الجميع للاطمئنان عالوضع العام.
-صباح الخير للمعلم والمعلمه اللي عم يجتهدوا كيف بدهم يدرسوا الطلاب عن بعد.
-صباح الخير للعامل اللي عم بجهز حاله ينزل عالمعبر عشان رزقة ولاده،ربنا يحميكم.
-صباح الخير للست اللي مقضيتها تعزيل وغسل برادي وحرامات وسجاد .
-صباح الخير للحج والحجه اللي صاحيين يقرؤةلهم جزء من القرآن.
-صباح الخير للجندي بالشارع والدكتور بمكان عمله والاطفائي وهو بغامر بحياته كرمال انقاذ الناس.
-صباح الخير للاستاذ فتحي الدلال اللي خلف هالشمعات الحلوه غسان وبشار واللي انا بحكيلهم الله يجبر خاطركم زي ما بتجبروا خاطر الناس وربنا يباركلكم .

#ومش صباح الخير للبحتكروا وبستغلوا الناس وبرفعوا اسعار مواد التعقيم،والله لا يباركلكم.

#صباح الفل لعيونكم وميت ورده الكم ايها المتابعين الكرام.